i bin a frau
happy v-day meine liabn, i werd jetzt mit eich a poa gedanken teiln. wenn eich de nit so passn, bitte akzeptiats des, doss des meine sein. i nimm eich eire a nit weg. i wü nit schon wieda so vü nachrichtn in meinen dms haben mit „du darfst an kind nit sogn, doss de mama a kind auf de welt bringt. des aschreckt a kind.“ jeda wie er will ok? a supa pädagogin hot ma nämlich gsog: du konnst an kind olles realistisch aklean, holt KINDGERECHT. oba des is a ondas thema. i fong amol on ok?
i bin a frau, 23 joa olt und hon kane kinda. wonn i kinda hobn will und ob i überhaupt ane gregen will oda konn, is a ding, wos i nit öffentlich besprechen muss. dennoch lochn mi leit on und frogn, wonn es so weit is. hubertus, des geht di nix on. und maria, na nit jede frau will mit 24 mama wern und tina, es is holt de froge, wos da partner a will. niemand will über sei gehalt redn, oba iba de familienplanung von fremden?
i bin a frau, i deaf ruhig mehr verdienen als a mann ohne mi rechgtfertigen zu miasn. i deaf karriere mochn, ohne doss i damit es kapitel mama sein obschliasn muas. i bin nit emanzipiat, lei weil i find, i konn genauso karriere mochn. nie im lebn gib i mein 40 stunden job als redakteurin her, lei damit partner mehr schepfen kennt. und des is zum akzeptian. i find es echt oag, doss frauen träume verboten oda vabaut wern, sobald se kinder gregn oda vaheiratet sein. jeder und jede dürfen machen, was SIE wollen.
i bin a frau und hab mei periode. monatlich. monatliche schmerzen. du hast ka recht mir zu sogn, doss i mi nit so anstellen soll. meine schmerzen konnst du nit spian, also urteil nit driba. wenn i sog, i kann dir nit beim umziagn helfn, weil i mit regelschmerzen im bett lieg, is des ka faule ausred. wenn i nit arbeiten kann, weil i fieber hab durch meine periodenkrämpfe, is des a begründung. i greg es speiben, wenn frauen anderen frauen sagen „wärmeflasche aufe aufs bauchi und moch ka theater.“
i bin a frau und hab gefühle und darf mei meinung sagen. wieso is mei kritik an jemanden mit „du bist zickig!“ zum begründen oba wenn a monn de gleichn argumente greg, wird er ghert? mei kritik entsteht nit aus meinen hormonen ausa und na i hob nit meine toge, wenn i grantig auf wen bin. wenn a person scheiße baut, bin i has und des loss i ma nit nehmen oda ausreden. i hab es satt, als zickig oda sensibel betitelt zu wern, lei weil i nit imma happypeppy drauf bin.
i bin a frau und hon mehr zu bieten als tepf und oasch. mei intelligenz hot mehr vadient als lei „bist du a gscheid mädel!“. i bin a frau verdammt, ka mädchen. i bin 23 joa olt und leb eigenständig und finanzia ma olles selba. i kann a ohne mann, nur lieb i mein partner, der mi gleichberechtigt sig. i kann genauso erfolgreich sein und dinge schaffen.
i bin a frau und was heite, noch anigen joan, wos es hast na zu sogn. wie vü junge frauen haben sex, weil se miasn. heit is valentinstag, wie vü frauen müssen an blosn, und wollen des goanit? findn des grausig. i sog es so oft bis es a jedes gericht und jeder hintawäldler checkt und akzeptiert: Wenn jemand keinen geschlechtsverkehr will und dazu gewzugen wird, egal ob vom ehemann, partner oder irgendwen, es ist eine vergewaltigung. und ob sie a kleid getragen hat oda ob sie frech woa: DES IS KA EINLADUNG. solong des imma noch a „des opfer is mitschuld“ spiel is, holt i nit mei pappn. jeder monn, der a schwanzbild vaschickt und frauen belästigt und frauen hintaherpfeift, hot kan respekt verdient. ka bisi.
i bin a frau und frei mi fia jede andere frau, de etwas erreicht. dieser konkurrenzkampf is zach, vor allem zwischen frauen. in ana welt, wo a monn schnell mal mehr vadiant als a frau, grundlos btw, is jede frau in ana chefposition zum FEIERN. und nit zum NEIDIG sein. bei jedem facebook kommentar, des frauenfeindlich is und von da feder einer anderen frau stammt frog i mi: dei ernst?? wir miasn den frauen der zukunft doch aklean, doss se olles erreichen und schoffn kennen und nit lei des andre geschlecht. wir miasn den männern der zukunft sogn, doss se jedn mit respekt behandeln und gegenübertreten sollen.
i bin a frau und was, wie schlimm geburten sein kennen. i was, doss es frauen gibt, de danach in depressionen verfallen und es nit geil finden, danach mama zu sein. und anstatt driba zu schweigen und zu sogn, ES IS HOLT So. konn man driba redn und sich hilfe holen. i was, fia viele is dieser storch vorm haus a nette sage und a tradition, de man nit verändern konn. i schwörs eich, wenn i an storch vua meina tia hätt, drisch i des ding ein. WIESO darf man nit dazua stehn und ehrlich sogn „i hon des kind zur welt gebracht. meine yoni is dadurch valetzt woan und i trog momentan windeln.“ des wochenbett, wos heit fost a trendwoat woan is und viele driba redn, woa domols a tabuthema und quasi wos zum schomen. i man???? dei körper leistet do GROSSARTIGES und niemanden deafst danach wos genaues dazeln?
i bin a frau, a mutige frau, de oft zehrlich is und oft belächelt werd. dabei kern jo de leit belächelt, de wirkich glabn, doss jede frau zum daham bleibn hot und a monn nit kochn muss. wieso muss des a frau? lei weil des DOMOLS so woa? i man hallo??? dinge ändern sich, situationen a. vua an joa hot a kana gmant, doss wir lei mehr mit maskn umalafn.
i was man konn kane leit ändern, vor allem de, de echt glabn se sein unbelehrbar und wissen alles. i bin nit unbelehrbar und i was nit alles und i bin stolz auf mi, doss i so gscheid bin und ma des eingesteh. i kann imma wieda wos neies lernen. i trau mi, dinge zu hinterfragen. dafia muas i ka frau sein, des deaf jeder. i konn mi über de coronaimpfung informieren und was, doss dieses unfruchtbar scheis anfoch lei a scheis aus den schlecht recherchierten medien sein. jede frau, de sich de pille mit zigaretten einestopft kann leicht unfruchtbar sein, des is eich oba egal??? i konn mi über rassismus weiterbilden. i konn gewisse sprichwörter hinterfragen und dinge wie „jedem des seine“ aus mein sprachgebrauch löschn.
ihr seids a nit unbelehrbar, also vaholtets eich nit so.
I bin a frau und hoff, doss i imma mehr frauen mut schenken deaf, den senen die gesellschaft gnommen hat.
bleibs gsund. ❤️