Liebes Christkindl 3.0

Liebes Christkindl,

alle Jahre wieder. Von 2018 und 2019 kannst da es Briafl jo noch amal nachlesn, weil heia wird.. ondas.

Du wast woascheinlich genaus wie i, um wos es gehn werd. Kimmst du a nerma ausn Kepfln peitln ausa? weil olles sowos von schräg/ ondas und komisch is? hätt ma vua an joa gredet, wie des heia werd, hätt i optimistisch-idiotisch gsog „BESSA“ olles wird bessa. Jetzt will i anfoch lei hoffn, doss es 2021 kan weltschmerz mehr in der form gibt. jo schmerz, wos weh tuat. richtig fest weh tuat.

Wos soll ima den wünschn von dir? Gonz ehrlich, mir follt nix Materielles ein. Ausa an gscheidn Lottogewinn, damit i bisi mehr geld vateiln konn auf dera welt. damit man a poa Probleme lösn kennt von Menschn. weil geld is holt leida oft de anzige lösung, wenns um probleme gibt. Oba heia gibs wieda mol ka wunschlistn von mir. ausa a yogamattn, oba den wunsch hot ma wer ondas erfüllt (großes herzl).

Liebes Christkindl, gregst du a nit bei de gonzn gschissenen Kommentare auf Facebook es speibn? Gonz banal gsog. Warum muas da Kurt seit März unter jeden Coronapost sei kommentar herwerfn „OBA GRIPPE IS GENAUSO SCHLIMM!!!“ oda de Christa mit ihrn „ihr wollt uns zwangsimpfen????? NICHT MIT MIR!“ werd denen nit fad? Bei wiederholten kommentaren werd man jo gsperrt oda? glabn de immer noch den gonzn schas von wegen „corona gibt es nit“. segn de echt nit de leit, de kronk sein, de ondan de trauern und de, de überarbeitet sein? Nennt man sowos nit egoismus? zu behaupten, es is olles nit schlecht, lei weils an selba guat geht? Liebes Christkindl, so vü verstand und empathie konnst du sia heia nit austeiln.. oba nimm senen wenigstens de kommentierfunktion auf facebook weg!
Und i tat es jo so gern löschn, de blede gsichtsbichlarei, oba mei job braucht facebook, that’s why.

Fake News kenntest a amal ausramen gehn, wennst daweil host. weil i hob es satt, doss leit den „experten“ im internet mehr glabn, als den virologen in da echten welt. tat sich jeda amol 6 minuten hinsetzn und wirklich informieren, warum de coronaimpfung nit lei 12 monat getestet woan und und doss de uns sia nit depat(a) mocht, als de meisten e schon sein. Doss de impfung eventuell de freiheit hintabringt, auf de olle zählen- checken de irgendwie nit. Konnst du dafia sorgen, doss so sochen wie „Wer sich testen losst, greg an chip ins hirn“, verschwindet? I man, des is jo volksverblöderei so a satzlarei..

Oba jetzt weg von de Leit, de sich um di so wenig scheren, wie um de gesundheit ondara. Weil um de gehts nit. wenn de nit vastehen wollen, dass hinta jeder statistik bezüglich verstorbener menschen a trauernde gruppe hinterbliebender steckt und a verstorbene ECHTE person.. wie wüst denen noch helfen.

Red ma bitte über de Kinder, liebes Christkindl. de tuan ma am meistn lad und nit (nur), weil se maske in da schul trogn. Na, weil viele Eltern vergessen, den kindern de sicherheit zu gebn, de se brauchn und vadienen. i dablos es nit, doss es so vü kids do drausn gibt, wo a elternteil oda bade sich anfoch nit KÜMMERN. wer a kind hot, hot verantwortung. punkt aus. du konnst di nit anfoch zupfn. mir egal, wos zwischen den paarlen passiat is, des hot nix mit dem kind zu tuan. Bitte christkindl, gib so anen menschen doch kane kinder. wast wie vü täglich testen, üben und praktizian, weil se a kind wollen? Wie vü kennen des anfoch nit? wären oba de besten eltern da welt? Kinder haben olles auf da welt verdient. se dienen nit do, um als Ersatz zu dienen. se miasn und dürfen den grant und frust nit obgregn. man soll auf senen nit umareitn, weil sunst kana do is. bitte bitte bitte christkindl, schaug, doss es jedn kind guat geht.

Und wos sogst zu dem trend, doss sich anfoch zvü leit an großn Hund anschaffen? I man a Husky in ana Wohnung. und donn 3 mal am Tag spazian gehn. wo führt des hin? wos hot der hund fa Lebn? sollts dafia nit bestimmte regeln geben? Sogoa da klanste pups von Hund braucht vü auslauf. Wie vü tiere sitzn tog ein und tog aus daham? diafn nix ause, gregn folsches Fuatta oda goa kans. Tierleid fongt do on. und bricht ma es herzl. Christkindl, i hoff, du host nit zvü Welpen als Christkindlgeschenk im Gepäck. Klana sein se echt olle nett.

Denk bitte so wie i, on de gonzn Leit de sich „ondas“ fühlen, weil se vielleicht doch nit des Nochbadiandl lieben und weil se nix von kapitalismus holtn. Schaug auf se besundas guat, damit de nit vü grant und kommentare von den Verwandten obgregn ok?? i wü nit, doss de sarah, de sich freitags für des Klima einsetzt, tausendmal Ökotante genannt werd und weil se vegan ist, olle 3 sekunden an veganer witz obgreg. und doss da homosexuelle Luca bitte gonz anfoch nit gfrogt werd, ob des nit lei a phase is. Schick ma senen gonz vü kroft ok?

Wos i noch so feiern tat? Wennst den Leit a Wörterbuch zukommenlossn tatest, damit se wissn, doss Feminismus nit bedeutet, FRAUEN GRÖSSER MÄNNER. Sondern gleichauf. i habs satt, diese sexistischen sprüche und bledn weisheitn. Genauso wie du menschn bisi mehr liebe schicken tatest. weil den dauergrant.. des tuat jo nit guat.

I wünsch ma, doss de Leit mehr innere Ruhe finden, dosse en Grant lossn vaschwinden. I wünsch ma, doss kana einsam sein muas und jeda wen zum telefonian/ratschn hot. Schick bitte jedn, der sich einsam fühlt a liabs textl in form von ana ondan person. I wünsch ma, doss de Leit Gesundheit fua körperlichen Kontakt stellen, weil wegen Rona wärs gwesn. I wünsch ma, doss de Leit weniger egoistisch sein und mehr auf ondre schaun. I wünsch ma, doss jeden Menschn wos schens passiat, der a dron glabt. I wünsch ma, doss Normalität wieda bei da Tia einafliagt.

Oba Christkindl, i holt di nit länger auf. dei weg is no weit, de nocht so kolt. pass auf di auf. und a auf de leit. und a wenn fost kana mehr on di glabt- zag senen lei es gegenteil. 🌟