A holt de Pappn

Sorry jetzt schon der echt freche Titel. Heit gehts ums Vagleichn. Unglaublich, doss unsa heitige Gesellschaft imma noch auf Vergleiche setzt. Do wert man glott gezwungen, sich selba zu vagleichn, ohne des zu wollen. Mir reichts.Onfongen tuats jo schon bei Babys. Sogoa i als NIT-Mama holt des schwa aus. Wenn do a Person, de am besten folls a noch ka mama is, onfongt zwa kids zu vagleichen. „oag, der konn schon lafn und de schloft imma noch im Bett von eich!!“ Jo schen, des geht di an feichtn NIX on. Na ehrlich, wie frech kann man sein? Anfoch do so fremde oda verwandte Kinder zu vergleichen. A wenn de Kids des noch nit vastehn, se wochsn mit Vagleiche auf. Danke fia nix?? Und a diese Leistungssport-Mamas, de onscheinend jeden Sotz mit an Vagleich aufbaun miasn, damit ihr Kind jo no bessa driaba kimmt. Muas jo a nit sein. Hauptsoch den Kindan gehts guat und sie sein so guat es geht gsund.

Beruf. I bin a priviligiertes Wesen, i was es. I bin noch nit gonz 23 und hob schon an Job, wo ondre sich quasi de Finga leckn tatn. Und mi treffen de eifersüchigen Blick, oba weh tuan se nit. Und a de bledn Frogn wie „Oba du host nit studiat, wie geht des donn?“ ignorier i gekonnt. Auf olle Fälle glab i, redet in Österreich kaum wer übern Geholt, weil de Vergleicherei lei schlimm wa. Und ständig muas wer auf Insta, Facebook oda ana Party sogn „ALSO I TAT NIT FIA 1200 EURO OABEITN GEHN!!“ des sogn oft (nit immer) Studenten oda Leit, de selbstständig sein. Und i frog mi, wie vü de in da realität leben? I kenn gnuag Leit, de fia des geld obeitn gehn MIASN. Nit jeder hot a WAHL. Und donn zu sogn, man hat selber des sicher nicht nötig- jo kloa. I wünsch jedn, doss er guat verdient, oba vagleichn muas man sich do nit so frech. Oda bessa gsog, anfoch über ondre driba stellen. Wissts wos i man?

Beziehung. Auf Instagram schaut jede Beziehung pipifein aus. Meine a. Meine is a in echt pipifein. Vor allem in der Öffentlichkeit. gspült? Ka bisi. OBA: wer uns 3 Stund zomm auf ana Veranstaltung sig, was nit wie ma mitanond umgehen in 9 Stund zamm in da Wohnung. (manchmal werd i als chaotisch betitel in privaten Räumen..) Wos i holt sogn will: Vagleichts eicha Beziehung nit mit ondaren. I man i kenn des zu guat. Des Mädel, des Rosn greg hot zum Monatstog, woa glücklich- wir nit, de de kane greg hom. Da ondre zohlt seina Puppe ein Urlaub, a ondra Partner daleistet sich des holt nit. Des ane Mädi darf alan fuat gehn, des ondre Mädel deaf des nit. Sich mit fremden Pärchen (also a wenns Freinde oda Gschwista sein) is anfoch sinnlos. Anfoches Beispiel: Paarle A is voll extrovertiert, bei Paarle B is a Parnter komplett a Intro. Natürlich wird des Paarle B auf ana Party immer mehr zommpickn, weil da ane Partner sich nit so wohl fühlt. Oba bei Paarle A sein gonz vü ondre Freind do mit denen gratscht werd. Do losst man den Partner schon amol mit ondaren stehen. Wissts wie i des man? Doss nur weil a Paarle in der Öffentlichkeit zommpickt, sein se nit „Grausig kitschig“ oda „oam“, se schaugn auf sich. Lei wenn dei Partner liaba mol mit Freind redet (wenn er se dank dir lei amal in 3 Monat segn darf haha) stott zu dir huckt, spinn nit uma. Vagleichts eich bitte nit mit ondaren Paarlen, schauts wos EICH guat tuat ok????

Figur/Aussehen. Des tuama holt am eftesten, vagleichn wie wer ausschaug im Vagleich zu uns. Mir kimms Speibn wenn a mädel frogt „schatzi bin i fescha als sie???“ des tuat nix zur Soch, wenn du manst, es Ausschaugn sog mehr aus als da Charakter- gutn Morgen. Gonz ehrlich, wenn mei Partner sog, de Frau is Fesch, is des jo so ok. Er werd ma jo nit glei obhaun, lei weil de holt supa hübsch is. De ongst zu hobn is doch paranoid. Mit Aussehn alan werd man nie weit kemen- nit amol bis zum Sex. KA ONGST. und genauso mitn Abnehmen. Wie oft redet man, wenn wer dicka woan is? Und schaug auf seine Fias, ob de wohl dinna sein wie von der Person. Und donn kemen de Frogn, wie man obgnommen hot. Und i find des anfoch giftig für unser Generation/Jugend. Nur weil do a Loch zwischn de Schenkalan sein, is des Hirn nit gresa und da Charakta bessa. 

Lächerlich mochn. Jo jetzt no schnell wos in eigener Sache. Leit, de sich vagleichn und donn merken „Fuck, de Person is iwie bessa als i“ wern schnell unguat. Und do gib i eich an Special Laxobu-Tipp mit: IS MA SO EGAL.

A Mädel, des gleich olt is wie i und donn mault „So oam, de laxobu mit ian blog!“ und im besten fall noch nit amal an Bachelor hot mit 23-24 joa, oba seit dem se 18 is studiat und nit amal im Sommer arbeitet- gonz ehrlich, soll se sich lächerlich mochn.

A Typ, der 35 is und unglücklich vaheiratet is, jedn tog saftln geht und anfoch ka Freid am Leben hot, konn mi gern belächlen und sogn der Job is a Nummer zu groß fia mi- gonz ehrlich, soll er sich lächerlich mochn.

A Gspusi, des i gschickt hon aus diversen Gründen, konn gern laut sogn, doss i beziehungsunfähig bin und a emotionale Kataschtrophe. Sog de Person, de in ana holbgeilen Beziehung steckt mit an neidigen Weibl, de sich nit ongreifn losst, weil se jo nit hübsch genug is und so. Der Typ hot sicher an Plan von Leben- gonz ehrlich, soll er sich lächerlich mochn.

Leit, de nit miad wern, zu behaupten, doss i des olles fia Aufmerksamkeit tua, wern nie wos guates fia de Welt leistn, sundan lei fest Neid und Grant auf da Welt vateiln. De segn nit, wie viel Menschen i eventuell helfn konn damit.- gonz ehrlich, solln se sich lächerlich mochen.

Solln sich so ane leit lächerlich mochn, weil i hab nit amal Mitleid fia so ane Leit übrig. Juckt mi nit. Weil wer sich lächerlich machen darf, sein richtige Journalisten. Oba de mochn sich nit lustig über mei Oabeit, de tatn ma konstruktive Kritik gebn! Nur Leit, de in diversen Dingen über mir stehen (Beruf, Reife und so) bekommen zu ihrer Kritik a Ohr von mir. Olles unta mir (is nit arrogant gmant, oba ehrlich) kennen sich gern den Schnobl fusslig reden. Hobs ihr amol wo Erfolg.
Da große Untaschied zwischn eich und mir (und den Menschen, de so denkn wie i): I vagunn ondan Erfolg und Glück. I finds cool, wenns neiche Startups ausn Bezirk gibt, wenn wer schnell mitn Bachelor fertig is oda an geiln Job hob- i hobs selba so guat, des diafn ondre leit a so guat hobn. Erst wenn man des Mindset hot, konn man leichta lebn. Glabs ma des.

Und genauso will i, doss ihr a denkts- wenn eich wer so depat kimmt. Ihr seids imma mehr wert mit eichan goldenen Charakter und ehrlichen Herzl als solche Menschen.

Ihr seids supi.