Ausleben is aufgeben
„He i muas gehn- mi ausleben.“ Stille.
Ausleben is Aufgeben. Weil es eigentlich lei a feigs Aufgeben is. De Kommunkation, de seit Wochn oda Monaten fallt, werd mutlos anfoch in de Eckn gekickt. Hätt er lei amol wos gsog, wär schon wos passiat. So mutlos anfoch nix sogn und donn gehn. Wie soll des donn de verlossene Person verstehn?
Du legst a Beziehung aufs Eis, nur damit du in irgendwelchen Clubs Liada fia Girls auflegen konnst? De sena Vodka lei mit Eis trinken.
Du mochst Schluss, damit du semigeilen Sex erfahren deafst, mit Wildfremden, de nit mol den Untaschied zwischen Klitoris und Vagina kennen.
Du brichst ihm es Herzl, nur um aus dem Alltagstrotz auszubrechen, noch welchen du di noch drei Wochen e wieder sehnst.
Du bist aus da BZ ause, weil du Sochn probian wolltest, de er nit wollt. Onstott zu sogn, du wüst es probian host glei a „I geh mi ausleben“ obkassiat.
Wen man jung is und wos erleben will, stört a Partner onscheinend. Oba eigentlich stört de Frequenz zwischn eich komplett. De hot an Fehler. Wenn i heit zu mein Parnter sog „I geh auf an Rave.“ sog er vü Spaß. Holt mi eventuell ob. Ondre sogn nix, weil da Partner es nit mog, wenn man alan fuatgeht.
Alan des is wieder so a Soche. Wieso darf man nit alan fuatgehn? Wieso darf man nit mit Freunden (olle Geschlechter) brunchen gehen? Wos is so schlimm an an Jungsurlaub? Hast ko nit „Zwangs-Betrügn-Saufi-Ausflug!“
I woa a amol jung und dumm und hob gmant a Beziehung vakroftet des olles nit. Coffee mit seiner BF? Jo sia und donn kimt sie schwonga zruck. NA DANKE. Dabei is des olles Bledsinn. Woher homa denn bitte de gonze Ongst?
Spoiler: A Beziehung funktioniert nur, wenn man offen und ehrlich is. Und a getrennt Sochen erlebt. Gonz anfoch. Festival, Konzerte, Partys, Urlaubs, Treffen. Sogoa Auslandssemester oda Jahr gehen voll klar.
Ausleben klingt ima witzig. Gmant is jo Schmusn und Sexln. Es klingt so fresh, is es oba holt so gonz und goa nit. Des sog eich de weise, grauhaarige Laxobu.
Dieses Ausleben endet so oft mit ungeplanten Gefühlen, ungewollten Vergleichen und Tränen und Sehnsucht.
Ausleben is a faule Ausred. Es geht a ohne. Bessa gsog gehts a mit Beziehung. Also nit schmusn und sexln. Guate Beziehungen sein voll mit schmusn und sexln, doss man do ka Verlongen noch mehr hot.
beispiele loss i derzeit so schleifen also heit a gonze Portion:
Da Linus snust. Heimlich. Sei Girl findet es grausig. Oba er tuats. Und wenn se draufkimt gibs Ärger. Bled. Onstott zu sogn „He Maus, i snus wenn du nit do bist, wenn du do bist, tua i nit.“ Liagt er und sog er tuat nerma. Und so gehts imma weita.
Die Mila kokst. Is jetzt echt a hoates Beispiel oba leider Realität. Ihr Boy is antidrogen. Sie kimt oba nit davon weg. Ihr Boy mocht ka Drama. Er losst se lei nerma ausn Haus alan, sperrt se ein. Wa nit gscheida zu ana Drognberatung? Wa nit bessa, ihr echt zu helfen? Wal sie geht. Ausleben. Sex& Drugs. Grenzn? Kane. Ende? Nit happy.
Die Kerstin mog de Freinde von ian Boy nit. Also deaf ia Boy nerma zu de Jungs. Weil de kennen gach schlecht über sie reden. Dabei redet lei de Kerstin schlecht über se. Nit se über sie. Jeds Mol, wenn er bei de Freind is, mocht sie Theater und bleat. Ihr Boy will se schicken und sich ausleben. Oba er is gscheid und sog ihr „Se tuan da nix. Des sein meine Freinde. De kenn i schon mei Leben long. Di nit. Sie sein ka schlechta Einfluss. Entweder du akzeptiast des und mochst ka Drama mehr oda du gehst.“
Die Celine will ins Ausland. A Joa. Ihr Freindin sog „I oda es Auslond.“ Unfaire Partie. Oda? Celine is im Auslond, mega happy und froh, nit wegen an Menschen gebliebn zu sein, der sich als Partner wichtiger nimmt als der Wunsch des anderen.
I wünsch eich OLLEN schene, gesunde und glückliche Beziehungen. Mit Menschen, de eich lieben. De eich nockentiga sexy finden und ongezogena a. De eich fuat gehn lossn, de eich bledsinn mochn lossn und auf eich aufpassn. Bitte seids eich so vü wert, doss ihr eich nit untan wert hergebs für irgendwelche Menschen de eich schlecht behandeln.
❤️❤️❤️❤️❤️❤️❤️❤️